കാക്കണേ കരിഞ്ചാത്താ

എന്റെ തൈവേ...
എല്ലക്കല്ലു ചാമീ...
കാക്കണേ കുഞ്ഞു കുട്ടിപ്പരാതീനം...
കാവുവെട്ടീ കൊളം നേത്തീ വന്നേ
നാട്ടിലേ കാടരീ ക്കാട്ടിൽ
കാക്കണേ.. കരിഞ്ചാത്താ..
കാട്ടിലെപ്പാവമീ ചെടിയെ മരത്തിനെ
കാക്കണേ.. കരിഞ്ചാത്താ..
കാക്കണേയെങ്ങളേം നിന്നേം..

താതിന്ത താതിന്ത താതിന്ത തെയ്തോ
താതിന്ത താതിന്ത താതിന്ത തെയ്തോ
താതിന്ത താതിന്ത താതിന്ത തെയ്തോ
താതിന്ത താതിന്ത താതിന്ത തെയ്തോ

ഏടെന്റെ തൈവേ കരിഞ്ചാത്തനേടെ
കരിങ്കാവു കണ്ടിച്ചിടുന്നെന്റെ തൈവേ
ശവക്കോട്ട പോലെ പെരക്കോട്ട കെട്ടാൻ
മുറിച്ചിട്ടു മാവും പിലാവും കവുങ്ങും
..................(താതിന്ത താതിന്ത താതിന്ത തെയ്തോ..........)

പര്യമ്പരത്തിന്നു കാവില്ല ചാത്താ
അന്തിത്തിരി വച്ച മരമില്ല ചാത്താ
പൂമീ തൊരന്നുള്ളു  മാന്തിപ്പെറുക്കീ
പൂവില്ല പൊഴയില്ല പൂഴിയില്ലല്ലോ
..................(താതിന്ത താതിന്ത താതിന്ത തെയ്തോ..........)


പെരക്കോലു കുത്താങ്കെടന്നോട്ടമോടീ
ചതിച്ചില്ല ചാത്താ തൊരന്നില്ല ഞങ്ങൾ
മരം നൊന്ത വേവും നെലം വിണ്ട തീയും
നിരീക്കാനുമയ്യോ കൊടും പേടി ചാത്താ
..................(താതിന്ത താതിന്ത താതിന്ത തെയ്തോ..........)

കുരുപ്പൂ കൊടുത്തൂ കുരുംബമ്മ പണ്ടീ
കുരുത്തപ്പിഴയ്ക്കും കുറുമ്പേറ്റിയോർക്കും
ഒരുപ്പൂവിറുക്കാൻ ചെടിച്ചോടുമില്ലേ
തുണയ്ക്കേണമപ്പാ പെണങ്ങല്ലെയമ്മേ
..................(താതിന്ത താതിന്ത താതിന്ത തെയ്തോ..........)